അദ്ധ്യാപകരുടെ മുറി

ഉറങ്ങുന്നതിന്റെ

ചിട്ടവട്ടങ്ങളെല്ലാം

അര്ത്ഥശൂന്യമെന്നറിയാന്‍

അദ്ധ്യാപകരുടെ മുറിവരെ പോകണം

കുട്ടികളെയൊക്കെ

ഡസ്കിലടിച്ചുണര്‍ത്തുന്നതിന്റെ

ക്ഷീണമെത്രയെന്നറിയാൻ

അദ്ധ്യാപകരുടെ മുറിവരെ പോകണം

സൺഷൈഡിന്റെ തണലുപറ്റി

കുട്ടികളെ അസ്സംബ്ലിയിലാക്കുന്നതിന്റെ

പങ്കപ്പാടറിയണമെങ്കിൽ

അദ്ധ്യാപകരുടെ മുറിവരെ പോകണം

ഒറ്റമൂത്രപ്പുരക്കു മുന്നിൽ

തിക്കുംതിരക്കും കൂടുന്നവരെ

അടക്കിനിർത്തുന്ന വേദനയറിയാൻ

അദ്ധ്യാപകരുടെ മുറിവരെ പോകണം

സർക്കാറിന്റെ കഞ്ഞിയും പയറും

വിളമ്പിത്തീക്കുന്നതിന്റെ

പരിശ്രമഫലമറിയണമെങ്കിൽ

അദ്ധ്യാപകരുടെ മുറിവരെ പോകണം

അദ്ധ്യാപകരുടെ മുറി

ഒരു ചരിത്രരേഖയാണു

ഇഴകീറി പരിശോധിക്കേണ്ട

ചരിത്രപുസ്തകം

ഏതു കമ്പനിയുടെ

എത്ര ഗൈഡുകൾ വിറ്റാൽ

പാൽക്കാരനുള്ള പണമെങ്കിലുമാവുമെന്ന

കണക്കുകൂട്ടലുകൾ

സാമ്പത്തിക സ്വാതന്ത്ര്യം വഴി

സ്ത്രീ സ്വാതന്ത്ര്യമുയരുമെന്നതിന്റെ

ജീവിക്കുന്ന രക്ത്സാക്ഷികളുടെ

നിലവിട്ട മയക്കങ്ങൾ

ധാർമ്മികതക്ക്‌ ഇഴഭംഗം വന്ന

അവസാന ബെഞ്ചുക്കാരിൽനിന്ന്

എങ്ങിനീ മാനം കാക്കുമെന്ന

ഭയപ്പാടുകൾ

അദ്ധ്യാപകരുടെ മുറി

വേവലാതികളുടെ കലവറയാണ്‌

നടുവേദന

നടുമുള്ളു വേദന

പെയിൻ ബാം പുരട്ടാം

എത്ര പുരട്ടിയതാ

എന്താണിതിങ്ങനെ,മാറാത്തത്‌

തിരുമ്പിയിട്ടാവും, കുമ്പിട്ടതല്ലേ

അതിനുമാത്രം എന്താണിത്ര

...................................

നാലു തുണിയും ഒരു ഷർട്ടും

...................................

......................................

വേദനക്ക്‌ കുറച്ച്‌ സുഖം തോന്നുന്നുണ്ട്‌

വെറുതെ ഒരോരോ തോന്നലുകൾ